MBM 24 NEWS

परळीच्या सिमेंट फॅक्ट्रीत कामगारांची सुरक्षा वाऱ्यावर 

 कर्मचाऱ्याचा फॅक्टरीतच सापडला मृतदेह 

परळी वैजनाथ (प्रतिनिधी) येथील सिमेंट फॅक्ट्रीमध्ये कामगारांची सुरक्षा अक्षरशः वाऱ्यावर सोडण्यात आली आहे. सिमंटचे सॅम्पल घेण्याचे काम करणार्‍या कामगाराचा फॅक्टरीतच मृत्यु झाल्याची घटना मंगळवार दि.4 एप्रिल रोजी घडली. सिमेंट फॅक्टरीच्या निष्काळजीपणाबद्दल संताप व्यक्त केला जात आहे. 

       या घटनेबाबत अधिक माहिती अशी की, परळीच्या गणेशपार भागातील नारायण संभाजी फड हे दोन वर्षांपासुन सिमेंट फॅक्ट्रीमध्ये सिमेंट सॅम्पल घेण्याचे काम करतात. या सिमेंट फॅक्ट्रीत 130 फुट उंचीवर जाऊन हे काम करावे लागते. नारायण फड हे सोमवारी (दि.3 एप्रिल) रात्री 10 वाजता कंपनीत कामावर गेले. परंतु सकाळी 6 वाजता परत घरी आले नसल्याने घरातील व्यक्तींनी त्यांना फोन लावला परंतु ते उचलत नव्हते. तेवढ्यात कंपनीतुन फोन आला व नारायण फड हे घरी आले का याची चौकशी केली. यानंतर सकाळी नातलगांनी संभाजीनगर पोलिस ठाण्यात मिसिंगची तक्रार दिली. 

         दुपारी 4 वाजता नारायण फड यांचा मृतदेह 130 फुट उंचीवर सिमेंट सॅम्पल घेण्याच्या जागेजवळुन बाहेर काढण्यात आला. त्यांच्या मृत्यूबद्दल माहिती मिळू शकली नाही. नारायण फड यांच्या पश्चात आई, वडील, पत्नी, एक मुलगी व एक मुलगा असा परिवार असुन हा परिवार आता उघड्यावर पडला आहे. 

    याप्रकरणी त्याची पत्नी चांगुणा नारायण फड यांच्या फिर्यादीवरुन संभाजीनगर पोलिस ठाण्यात अकस्मात मृत्युची नोंद करण्यात आली आहे. दरम्यान कंपनीमध्ये कामगारांच्या सुरक्षेबद्दलचा निष्काळजीपणा उघड झाला आहे. यामुळे नागरिकांमध्ये संताप व्यक्त केला जात आहे.